Autoriteti holandez i Lojërave (KSA) ka mbyllur 20 aplikacione të paligjshme të lojërave të fatit në tre muajt e fundit, njoftuan sot mediat holandeze.

Siç është paralajmëruar, ky shërbim po monitoron gjithnjë e më shumë punën e aplikacioneve të tilla pasi problemi i lojërave të paligjshme të fatit është bërë gjithnjë e më i theksuar në Holandë, shkruan NL Times.

Sipas shërbimit të KSA-së, është veçanërisht shqetësues fakti që disa nga këto faqe janë të qasshme për të miturit, transmeton Telegrafi.

Ofruesit e paligjshëm të lojërave të fatit shpesh tërheqin përdoruesit duke përdorur logon e ofruesve të licencuar për t’u përfshirë në këtë lloj aktiviteti, paralajmëroi KSA.

Kështu, gjatë hetimit, u zbulua një shembull i një aplikacioni në Apple App Store që përdorte logon e Holland Casino

Aplikacionet ilegale gjithashtu reklamohen shpesh si lojëra legale, por kur një përdorues i shkarkon ato, ato çojnë në faqe të paligjshme bixhozi.

KSA-ja u ka bërë thirrje përdoruesve që të vazhdojnë të raportojnë aplikacione të tilla ilegale.